Cara mo Belajar Tarot

Ada yang batanya kalo mo belajar ba Tarot musti sadia apa-apa???
Depe kostum bagimana, apa samu tu rencis-rencis yang perlu sadia???

Kalo dari kita sandiri, cuma senyum karena dorang nentau makanya dorang ba tanya. :)
Yang pasti kalo mo belajar tarot, so musti ada kartu tarot. Boleh lia di situ kalo suka mo pake kartu model bagimana.

Yang pertama deng yang penting musti tau, bagimana model tu mo pake kalo mo ba Tarot.

Secara umum ada dua model; yang pertama depe orang yang babaca Tarot pake Intuisi Murni, deng yang kadua dia pake Analisa Psikologis.
 

Pake Intuisi Murni; Depe tukang baca Tarot cuma buka tu kartu kong dia langsung bacirita deng dia pe klien. Kalo yang model bagini dia cuma bilang apa yang muncul pa depe kapala, nda mo perhatikan tu kartu yang da buka.

Pake analisa psikologis; Depe tukang baca Tarot pelajari dulu tu kartu dari depe model/simbol kartu deng depe pengertian kong dia gabung deng dia pe analisa alam bawah sadar. Kalo cara bagini ada depe hubungan sebab-akibat dari tu kartu deng tu pertanyaan.

Tu dua cara di atas ada depe lebe deng ada depe kurang :

Kalo yang pake Intuisi Murni biasa depe analisa lebe kena/akurat.  Ada bayangan prediksi for apa yang kira-kira mo jadi kamuka. Cuma depe cara ini nda ada penjelasan jelas, depe sebab-akibat. Depe kurang le kalo cara yang bagini nda ja jadi trus, ada depe oras kalo itu boleh jadi. Jadi kalo memang rasa depe intuisi nda muncul, kong paksa baca lengkali ada berapa klien yang nda maso depe tujuan ba tarot. Ujung-ujung boleh beking jatung depe nama. 

Kalo yang pake analisa psikologis, dia boleh baca samua klien. Klien yang mo suka cari tau kyapa itu jadi pasti puas no kalo deng cara ini. Cuma kalo soal kena/akurat ato nda masih lebe bagus yang intuisi. Jadi kalo yang pake cara ini, dia musti kumpul informasi banyak-banyak dari depe klien deng musti bilang tu butul nembole badusta.

Terserah no pa tamang-tamang suka mo pake cara yang mana. Boleh mo pilih salah satu cara, ato boleh mo pake dua-dua deng resiko musti lebe serius kalo mo belajar supaya boleh lebe latih tu kekuatan intuisi deng daya analisa psikologis.

Sumber :
TAROT : Next Lesson, Rendy Fudoh

Kartu Tarot

Voor awal sebelum mo suka belajar ato mo suka dapa ramal pake Kartu Tarot, lengkali torang rasa beda. Beda karena ja lia model-model ato gambar-gambar Kartu Tarot yang beda antar orang yang ja ba Tarot.

Banyak orang yang baru blajar pasti pilih kartu Tarot Rider-Waite-Smith, karna boleh bilang ini kartu Tarot yang umum banyak tukang ba Tarot ja pake. Di artikel seblumnya so jelaskan ini kartu.

Model Tarot Rider-Waite-Smith

Kurang sama jo deng tu metode ato cara mo ja ba Tarot, Kartu Tarot yang ja ba Tarot ja pake tergantung kartu mana yang dorang rasa enak mo pake. Dorang rasa kalo pake itu kartu dorang pe Intuisi bajalang, ato sampe dorang rasa kalo tu kartu dorang pe bagian diri. Bale ulang ka soal rasa, dari yang ja ba Tarot deng tu orang yang suka dapa ramal Tarot.

Gilded Tarot

Kalo kita suka pake dua model Kartu, ada Gilded Tarot dengan Madame Endora's Fortune Cards.

Madame Endora's Fortune Cards

Model-model kartu Tarot yang ada :

Suka Kartu Tarot yang mana???

Belajar Tarot ??? Voor Apa ???

Tarot Reading

Kalo sebelumnya so sadiki mangarti apa itu Tarot, pasti so boleh ada gambaran kalo Tarot pe Tujuan sebagai alat vor mo baca keadaan ato situasi yang mo ba ramal (klien). Nanti mo liat ada peluang, tantangan ato ada solusi biar tu klien boleh mo pilih depe peluang vor hidop yang lebe bae. 

Tarot kalo mo kase banding dengan tu metode yang laeng, boleh bilang kalo Tarot lebe fleksibel boleh mo iko aros vor situasi yang beda-beda ato mo kase gabung deng metode for mo laeng le boleh.

Jadi kalo ada yang pernah belajar ba ramal deng metode yang laeng mo rasa depe beda, karna kalo deng Tarot boleh mo lia perkembangan ato masalah kong boleh kase alternatif mo bantu tu orang kase klar dia pe masalah dari kesempatan ato peluang yang dapa lia. Jadi Tarot bukang cuma mo pake ba ramal cinta ato situasi orang, maar sebenarnya Tarot boleh mo pake vor peluang laeng.

Kalo memang mo serius, musti komang mangarti tu cara mo kase tau tu kartu Tarot pe arti yang boleh berubah iko sesuai apa yang mo lia, jadi boleh bilang kalo butul-butul mangarti maksud dari kartu biar boleh mo pake di situasi yang beda-beda, depe contoh :

- Mo lia tu orang pe perkembangan diri sandiri deng perkembangan orang laeng

- Boleh mo jadi alat bantu vor mo meditasi

- Depe gambar-gambar boleh mo jadi inpirasi yang kreatif for segala bidang

- Boleh mo jadi media hiburan kalo ada acara-acara

- Boleh mo beking itu Intuisi ato mampu mo ba filing di sagala situasi

Dari yang kita sandiri rasa kalo blajar Tarot banyak kejadian yang beking mental jadi lebe kuat, lebe mandiri boleh lebe dewasa mo lia situasi deng yang paling penting lebe mangarti deng hargai tu hidop.

Atoran vor mo ba Tarot

Baca Tarot pake 3 kartu | Dok. Gathering Toyota se-Indonesia di Manado
18 Feb 2010

Tamang-tamang mungkin pernah lia orang yang ja ba "baca tarot" (tarot reader), ada banyak cara deng aturan yang dorang ja pake. Memang banyak model ato cara yang dorang pake.

Ada yang beking atoran kalo tu kartu tarot musti dari orang yang kase,

Kartu Tarot nembole orang yang mo ba ramal sontong,

Ada yang dorang suruh tu yang mo ba ramal pilih sandiri depe kartu,

Ada yang depe cara ba kocok deng depe jumlah bakocok beda-beda,

Sampe ada yang pake "ritual kase bersih" dia pe kartu Tarot,

Dengan sagala pantangan yang dorang beking sandiri.

Pe banya atoran deng cara vor mo ba tarot.

Maar depe inti dari samua atoran yang ada, ada satu atoran yang tamang-tamang mo blajar ba Tarot musti inga :

" Ngoni musti beking atoran sandiri yang ngoni rasa enak mo beking. Jadi mana yang ngoni rasa suka mo iko dari tu atoran yang ada, selama ngoni suka deng nda beking beban."

Dalam dunia Tarot, sagala tu atoran yang ada sampe apa yang tu tukang Tarot pe ritual deng aktivitas nda ada yang sama. Jadi beking jo apa tu rasa enak mo beking, maar komang jang so rupa tu orang gila deng sagala rupa ritual deng atoran.

Jadi diri sandiri, ambe apa yang bagus deng yang bae tu mo beking.

sumber : Tarot Next Lesson by : Rendy Fudoh

Apa so tu TAROT ???

Mungkin masih blum tau apa itu Tarot. Biar cuma sederhana kita mo coba kase gambaran.

Tarot itu satu pak kartu yang ada 78 lembar. Biasa ja pake for ba ramal. Ada 2 bagian di kartu tarot. Bagian pertama ada 22 kartu yang dorang bilang Arcana Mayor deng yang kadua ada 56 kartu dorang bilang Arcana Minor. Ada satu pak kartu Tarot yang paling banyak orang kenal depe nama Rider-Waite-Smith yang beking depe nama A.E Waite deng yang gambar depe nama Pamela Colman Smith. Ada tu dokumen sejarah yang dorang dapa kalo Tarot itu depe asal dari Italia. Sampe skarang ni Kartu Tarot masih top di Eropa, apalagi skarang so pe banyak torang boleh dapa ada yang ja ba Tarot di Kota Manado.