Belajar ba Tarot I : Belajar Pake Kartu Arkana Mayor

Arkana Mayor

Sebelum kita mo berbage cara gampang mo belajar ba Tarot pake Kartu Arkana Mayor, ini masih dasar ne…
Cuma ada yang so tasadap, dia ja pake trus baramal Cuma deng Arkana Mayor.
Skarang, sadia notes ato buku catatan for mo catat-catat apa yang tu ada beking.

Biar gampang mo inga, deng yang paling penting samua tua da catat ada dapa dari pengalaman pribadi. Muncul dari dalam tamang-tamang pe diri dari apa yang da rasa, apa yang dapa gambaran dari yang tamang-tamang lia.

Kalo sudah, ini depe cara paling gampang deng depe paling sederhana kalo mo belajar ba Tarot:

1.   Kase pisah kartu Arkana Mayor deng Arkana Minor . Arkana Mayor tu kartu yang ada depe angka Romawi mar dia mulai dari 0 (The Fool) sampe deng XXI (The World); kalo tu Arkana Minor kartu yang ada depe tulisan wands, cups, swords, atau pentacles. Kalo masih bingo boleh buka ulang di Kartu Tarot II.

Kase pisah, kong torang cuma mo pake yang Arkana Mayor. Ini baru depe cara gampang for tamang-tamang yang baru mo blajar ba Tarot.

Sebelum mulai kita minta serius deng fokus. Vor yang biasa menghayal, ni kali memang musti pake tu hayalan. Cari depe gambaran hayalan sesuai deng tu da suruh. Jang menghayal tu nyanda-nyanda.

2.   Ambe satu kartu dari 22 kartu Arkana Mayor

3.   Lia depe gambar yang ada di kartu kong jawab ni 5 pertanyaan:

a.   Bagimana model tu orang yang ada di kartu?

b.   Ada ba beking apa?

c.   Cuma satu orang ato benda? Ada yang laeng? Ada baa pa dorang?

d.   Dari gambar yang ada lia, dapa gambaran apa yang ada jadi? Pesan apa tu da rasa?

e.   Ada hal yang laeng, ato ada pesan ato rasa yang baku iko selain yang pertama?

Skarang kalo so klar jawab, coba baca ulang kong lia ulang tu kartu kalo ada pesan dari tu kartu yang da ta lewat. Kalo sudah, coba ulang ambe kartu yang laeng. Kita Saran, Rajin ja coba biar boleh lebe tabiasa deng lebe lancar.

Sama rupa piso ato peda, kalo rajin goso mo jadi lebe tajam.

Nanti brikut kita mo berbage apa depe makna dari masing-masing Kartu Arkana Mayor yang tamang-tamang ada tulis-tulis. Jang heran kalo ada yang sama.
Jang brenti latihan tetap berusaha...

Kartu Tarot II

Tulisan brikut depe lanjutan dari Apa so tu TAROT ???  deng Kartu Tarot. Kalo di dua topik yang pertama depe isi baru kase kanal tentang tarot deng kase tunjung depe model kartu.

Kalo yang skarang kita mo kase tau tu Kartu Tarot pe isi apa samua. Maar ini voor Kartu Tarot yang umum ne, bukang yang Oracle Tarot atau jenis Tarot yang laeng. Baca di dua tulisan di atas biar lebe mangarti.
Kartu Tarot (tarrochi) ato kartu nasib karena ja pake voor mo meramal nasib. Taong 1470 di Lombardy, Itali dorang dapa 1 set kartu ada 50 biji, teberbage jadi 5 kelompok masing-masing dia ada 10 kartu. Pada depe kartu ada ukiran tema alegori ato mitologi tentang sagala yang berhubungan deng torang pe hidop di situ ada samua tentang ilmu, seni, planet, deng masih banya yang laeng.

Tarot yang ja pake skarang itu Tarot Venetia yang depe jumlah kartu 78 biji.
Ta berbage dua klompok Major Arcana ato dorang ja bilang kartu Trump deng Minor Arcana. 

Sebelum torang lanjut, musti tau dulu apa itu Arcana
ar·ca·na - ärˈkānə its secrets or mysteries ato depe arti gampang 'Rahasia'


Arcana Mayor


Arcana Mayor (Rahasia Besar) ada 22 kart.dong ja bilang kartu trump, karena ada depe lebe kalo mo banding deng tu kartu Arcana Minor.

22 Kartu Arcana Mayor

              

0	-	The Fool
I.	-	The Magician
II.	-	The High Priestess (or The Popess)
III.	-	The Empress
IV.	-	The Emperor
V.	-	The Hierophant (or The Pope)
VI.	-	The Lovers
VII.	-	The Chariot
VIII.	-	Strength
IX.	-	The Hermit
X.	-	Wheel of Fortune
XI.	-	Justice
XII.	-	The Hanged Man
XIII.	-	Death
XIV.	-	Temperance
XV.	-	The Devil
XVI.	-	The Tower
XVII.	-	The Star
XVIII.	-	The Moon
XIX.	-	The Sun
XX.	-	Judgment
XXI.	-	The World

Arcana Minor

Arcana Minor (Rahasia Pelengkap) dia ada 56 kartu.
Dari 56 kartu, dia ta berbage jadi 4 model. Depe model ato klompok Kartu ada Cups = Cawan; Swords = Pedang; Wands = Tongkat; Coins / Pentacles = Koin.
Ato ada yang gambarkan ni 4 kelompok dengan elemen elemen api, tanah, air, deng udara. 

Kalo Elemen Api tentang perbuatan yang ja beking hari-hari, keinginan diri for mo beking sesuatu.
Elemen Air lebe bicara soal perasaan, percintaan deng bagimana tu pergaulan.
Elemen Udara tentang bagimana tu orang pe pande, deng yang berhubungan depe pikiran.
Terakhir tentang Elemen Tanah, lebe bicara tentang hasil kerja ato bagimana keinginan orang mo ba puas diri.

Di tiap model ato klompok Kartu ta urut dari As, 2-10, deng ada kartu bangsawan: Jack (Page ato Knave), Knight (Ksatria), Queen deng King. Ada 14 kartu pa depe model ato klompok. 

Ini Kartu Arcana Minor kalo skarang tamang-tamang ja biasa lia tu kartu remi sebenarnya sama, cuma kalo di kartu remi skarang kartu yang Knight nda pake. Jadi cuma 13 kartu di tiap model.

Cups = Cawan = Hati; Swords = Pedang = Skopong; Wands = Tongkat = Klawar; Coins / Pentacles = Koin = Sidu

Cara mo Belajar Tarot

Ada yang batanya kalo mo belajar ba Tarot musti sadia apa-apa???
Depe kostum bagimana, apa samu tu rencis-rencis yang perlu sadia???

Kalo dari kita sandiri, cuma senyum karena dorang nentau makanya dorang ba tanya. :)
Yang pasti kalo mo belajar tarot, so musti ada kartu tarot. Boleh lia di situ kalo suka mo pake kartu model bagimana.

Yang pertama deng yang penting musti tau, bagimana model tu mo pake kalo mo ba Tarot.

Secara umum ada dua model; yang pertama depe orang yang babaca Tarot pake Intuisi Murni, deng yang kadua dia pake Analisa Psikologis.
 

Pake Intuisi Murni; Depe tukang baca Tarot cuma buka tu kartu kong dia langsung bacirita deng dia pe klien. Kalo yang model bagini dia cuma bilang apa yang muncul pa depe kapala, nda mo perhatikan tu kartu yang da buka.

Pake analisa psikologis; Depe tukang baca Tarot pelajari dulu tu kartu dari depe model/simbol kartu deng depe pengertian kong dia gabung deng dia pe analisa alam bawah sadar. Kalo cara bagini ada depe hubungan sebab-akibat dari tu kartu deng tu pertanyaan.

Tu dua cara di atas ada depe lebe deng ada depe kurang :

Kalo yang pake Intuisi Murni biasa depe analisa lebe kena/akurat.  Ada bayangan prediksi for apa yang kira-kira mo jadi kamuka. Cuma depe cara ini nda ada penjelasan jelas, depe sebab-akibat. Depe kurang le kalo cara yang bagini nda ja jadi trus, ada depe oras kalo itu boleh jadi. Jadi kalo memang rasa depe intuisi nda muncul, kong paksa baca lengkali ada berapa klien yang nda maso depe tujuan ba tarot. Ujung-ujung boleh beking jatung depe nama. 

Kalo yang pake analisa psikologis, dia boleh baca samua klien. Klien yang mo suka cari tau kyapa itu jadi pasti puas no kalo deng cara ini. Cuma kalo soal kena/akurat ato nda masih lebe bagus yang intuisi. Jadi kalo yang pake cara ini, dia musti kumpul informasi banyak-banyak dari depe klien deng musti bilang tu butul nembole badusta.

Terserah no pa tamang-tamang suka mo pake cara yang mana. Boleh mo pilih salah satu cara, ato boleh mo pake dua-dua deng resiko musti lebe serius kalo mo belajar supaya boleh lebe latih tu kekuatan intuisi deng daya analisa psikologis.

Sumber :
TAROT : Next Lesson, Rendy Fudoh

Kartu Tarot

Voor awal sebelum mo suka belajar ato mo suka dapa ramal pake Kartu Tarot, lengkali torang rasa beda. Beda karena ja lia model-model ato gambar-gambar Kartu Tarot yang beda antar orang yang ja ba Tarot.

Banyak orang yang baru blajar pasti pilih kartu Tarot Rider-Waite-Smith, karna boleh bilang ini kartu Tarot yang umum banyak tukang ba Tarot ja pake. Di artikel seblumnya so jelaskan ini kartu.

Model Tarot Rider-Waite-Smith

Kurang sama jo deng tu metode ato cara mo ja ba Tarot, Kartu Tarot yang ja ba Tarot ja pake tergantung kartu mana yang dorang rasa enak mo pake. Dorang rasa kalo pake itu kartu dorang pe Intuisi bajalang, ato sampe dorang rasa kalo tu kartu dorang pe bagian diri. Bale ulang ka soal rasa, dari yang ja ba Tarot deng tu orang yang suka dapa ramal Tarot.

Gilded Tarot

Kalo kita suka pake dua model Kartu, ada Gilded Tarot dengan Madame Endora's Fortune Cards.

Madame Endora's Fortune Cards

Model-model kartu Tarot yang ada :

Suka Kartu Tarot yang mana???

Belajar Tarot ??? Voor Apa ???

Tarot Reading

Kalo sebelumnya so sadiki mangarti apa itu Tarot, pasti so boleh ada gambaran kalo Tarot pe Tujuan sebagai alat vor mo baca keadaan ato situasi yang mo ba ramal (klien). Nanti mo liat ada peluang, tantangan ato ada solusi biar tu klien boleh mo pilih depe peluang vor hidop yang lebe bae. 

Tarot kalo mo kase banding dengan tu metode yang laeng, boleh bilang kalo Tarot lebe fleksibel boleh mo iko aros vor situasi yang beda-beda ato mo kase gabung deng metode for mo laeng le boleh.

Jadi kalo ada yang pernah belajar ba ramal deng metode yang laeng mo rasa depe beda, karna kalo deng Tarot boleh mo lia perkembangan ato masalah kong boleh kase alternatif mo bantu tu orang kase klar dia pe masalah dari kesempatan ato peluang yang dapa lia. Jadi Tarot bukang cuma mo pake ba ramal cinta ato situasi orang, maar sebenarnya Tarot boleh mo pake vor peluang laeng.

Kalo memang mo serius, musti komang mangarti tu cara mo kase tau tu kartu Tarot pe arti yang boleh berubah iko sesuai apa yang mo lia, jadi boleh bilang kalo butul-butul mangarti maksud dari kartu biar boleh mo pake di situasi yang beda-beda, depe contoh :

- Mo lia tu orang pe perkembangan diri sandiri deng perkembangan orang laeng

- Boleh mo jadi alat bantu vor mo meditasi

- Depe gambar-gambar boleh mo jadi inpirasi yang kreatif for segala bidang

- Boleh mo jadi media hiburan kalo ada acara-acara

- Boleh mo beking itu Intuisi ato mampu mo ba filing di sagala situasi

Dari yang kita sandiri rasa kalo blajar Tarot banyak kejadian yang beking mental jadi lebe kuat, lebe mandiri boleh lebe dewasa mo lia situasi deng yang paling penting lebe mangarti deng hargai tu hidop.